ظهر الملاك السماوي على رجل غني فيما كان هذا الأخير يجمع ويكدّس مواسمه الوفيرة ويكتنز امواله وهو غارق في بحر احلامه العائمة على ثرواته الطائلة وفيما هو ذاهب ليهدم بعض الابنية الضيقة التي كان يملكها ليتسعيض عنها بأبنية اكثر اتساعاً لاستيعاب مواسمه التي لا  تحصى وثرواته اذ بالملاك ينتهره ها هو ملاك الموت يطلب نفسك فما هو مصيرك الآن ايها الغني العابث بالآخرة والقيم لروحية؟؟

وكان الغني مواسم عم بيجمع

وبخواطروالأحلام عم تلمع

ويهدم ويبني كون عا حلّو

حتى المخازن للجمع توسع

وفكّر بأنّو الكون محتلو

  والروح من جسمو ما رح تطلع

عابد المال وعايش بظلّو

وما عاد لا يقشع ولا يسمع

الاّ واجا الملاك عا محلّو

يا غني قلّو كفى تطمع

هالمال هاللي جامعو كلّو

بالآخره بدرهم ما رح ينفع

***

وهون الغني وجّو انقلب مبغوت

وعالمال بديو ينزفو جروحو

ويسأل لحالو كيف ممكن فوت

الجنّي اللي فيها عطور بيفوحو

والمال بشرور الارض منعوت

وبيوهم الإنسان بطموحو

ولو  كان تمثالو بدهب منحوت

وللغني بيشيّد صروحو

يا غني بكرا بتجي تا تموت

وخلفك الارزاق بينوحو

قلن يزيحو درفة التابوت

عنّك ويرّدوا للجسم روحو

***

يا غني حانت مواعيدك

والريح شتّت سقف قرميدك

هلق إجاك ملاك عزرائيل

مال كسرى ما بقا يفيدك

يكفى على مواسم غلال تميل

بستانك وكرمة عناقيدك

وتحط بالخزني قطع تمويل

ومال الجمعتو شايفو سيدك

وهلق انا جايي تا روحك شيل

قلّلي شو بدو يطلع بإيدك

***

إرجع لربّك  دشّر الأوهام

المال ضيّع روحك وعقلك

المال كلّو تجارب وآلام

لا تزرعو تا يفرخ بحقلك

ازرع الخير بيفوح عطر خزام

عطر السما بيصير يشتقلك

بجنة عدن لو كنت عم بتنام

وروح الطهر من طهر تشتقلك

عالمال لو بتوجّه الأحلام

شياطين بدّو يصير يخلقلك

***

يا غني اللي بجزرك وقدّك

شفت حالك ما حدا قدّك

حاجتك بمواسمك فرحان

المفروض تعرف وضعك وحدّك

ومن إلهك تطلب الغفران

للآخرة وتتأمل بغدّك

حاج عا خزن الدرر سهران

والها رصدت اتعابك وكدّك

نفسك اذا بهالوقت يا خسران

الله طلبها ولحقت جدّك

المال شيطان بألف شيطان

جهنم الحمرا وكل ما فيها

عا هالدني ما بتقدر تردّك