بقلم الشاعر نجيب داود – سدني

قدّيش لازم يا أبونا تكون
عندك نِعَم والرب بيريدك
تا جيت عا استراليا وممنون
الشعب كلّو من مواعيدك
جايي بإسم مار شربل ومارون
والله قداسي وتضحيي يزيدك
وحامل بقلبك مشحة الميرون
الرتلتها بخشعة أناشيدك
وحامل على شفاف المدى طربون
من أرزنا البيرتل بعيدك
وحامل غصن أخضر من الزيتون
رمز السلام بحكم تأكيدك
وجايب ذخاير جوهر المكنون
لمار شربل بصلوات تمجيدك
جبتها لقلوبنا عربون
تا نستلم العجايب بإيدك
***
للصومعه يا قلوبنا طيري
ومتل الشمع بالصومعه دوبي
ولا تقطعي لمار شربل السيري
صلّي قبالو واندمي وتوبي

وبركات لمي من هاك الديري
البصومعه بلا حروف مكتوبي
وهلق بسدني إنهضي وسيري
مهما تكوني قلوب منكوبي
من دخايرو اللي بياخد دخيري
بيقدر يلاقي ألف أعجوبي
***
طنوس نعمه بين خاص وعام
رعايتو عالكل شاملها
بونا وإلو في كل قلب مقام
ورعيتو بالعدل عاملها
وبدير مار مارون صلَّى وصام
ورسالتو وصَّل لكاملها
وعا إسم نعمي زادت الأنعام
من دخاير البلقلب حاملها
***
الرهبني بقلوبنا بتنقام
دخاير لها بالقلب مزروعه
الرهبني بتستاهل الإكرام
البدِّين والإيمان مطبوعه
وأكبر فخر إلها الأباتي العام
هادي محفوظ الإلو روعه
بالعلم بالآداب بالأحكام
محفوظ حافظ ألف موسوعه

والآباتي نعمة الله وسام
ورايي بجبل لبنان مرفوعه
للرهبني رافع لها الأعلام
ورقمو القياسي بكل مجموعه
***
وبهالمجال الرائع المشهود
الحق لازم تظهر شهودو
ولدير مار شربل ضروري نعود
لمار شربل البعجايبو وجودو
قلبنا عا مدبحو مصمود
محافظ على الإيمان وعهودو
ومنّا تحيي للتقا والجود
لرئيس الدير العزز جهودو
للريس لأسعد أبن لحود
اللي المركز بشخصيتو بيكبر
والدير عم يسعد من وجودو