كلُّ مَن يأتي ويسمع كلامي ويعمل به فله الحياة الأبدية، يشبه انساناً بنى بيتاً وحفر وعمّق الأساس وبناه على الصخر فاذا حدث السيل الجارف وصدم ذلك البيت فلا يستطيع عندئذ زعزعته. اما الذي لا يسمع ولا يعمل بموجب كلامي فيشبه انساناً بنى بيته على الرمل دون اساس فيصدمه السيل الجارف ويسقط هذا البيت ويكون سقوطه رهيباً.
قصيدة شعرية زجلية
منشان ندخل نعمة الملكوت
وما ينشّف المصباح من زيتو
لازم عا جوهر كل كلمي نفوت
يلّلي لمجد يسوع صليّتو
كلمة يسوع للجوع هيّي القوت
كلامو اذا من القلب حبّيتو
كلمة يسوع الجوهر المثبوت
وكلما كلام الحق لبيّتو
بتقشعوا الأنوار باللاهوت
ان كان درب النور نقّيتو
واللي بيؤمن بيسوع ما بيموت
يسوع قام من القبر ميتو
واللي بيبني عالرمال بيوت
غير البيبني عالصخر بيتو
* * *
تأمّل يا انسان وغيومك زيح
ومن القلب يسوع رتلّو
واسمع كلامو يا صديق مليح
المستحيل بتقدر تحلّو
وعن درب يسوع ولا سنتي تزيح
تمسّك بإيمانو النقي كلّو
وعمّق اساس البيت بالتسبيح
للمسيح ودوم هلّلو
مهما الرياح تهدّدك وتصيح
والسيول المستوى يعلّو
عا بيتك بيكسر جناحو الريح
وبيضل بيتك صامد محلّو
* * *
حلّك بقى توعى يا هالانسان
وتسمع يسوع كلام شو قلّك
قلّك تا تبقى ويثبت البنيان
عالصخر حتى تأسّسو دلّك
عالرمل تبني البيت يا غفلان
من هيك مبنى بقول يا دلّك
مش عارف جهنم لها شيطان
والتجارب عم يعدلّك
ان كنت لا مؤمن ولا فهمان
بالتجربي الشيطان بيذلّك
لكن اذا بالعكس عندك كان
الإيمان فيك وشاملك كلّك
والبيت مبني عا صخر صوّان
الشيطان مش معقول يوصلّك
وبيتك اذا بيهدّدو الطوفان
محلو بيبقى وانت بمحلك
* * *
بيسوع لازم نوضع الآمال
ونسمع كلامو ونصنع مليحو
وكلما نسمع قيمة الأقوال
منعمل بموجبها ولتسبيحو
يسوع هوّي النور والمشعال
وبالنور فينا عتمنا نزيحو
وبالإيمان الصادق المفضال
قلبنا بيقول تصريحو
منؤمن بيسوع اللي هوّي قال
تا همومكم منها تستريحو
البيؤمن بربّو بيزيح جبال
وبيتو ما في زلزال بيزيحو
* * *
بكرّر حديثي ليك يا انسان
وبشعر منظوم بيت وبيت
كلمة يسوع النور والقربان
كلمتو للطيّب وللميت
كلمتو هي خشبة الغرقان
وكلما يا خاطي بخشبتو تهدّيت
بالندامي بتحصد الغفران
وبسراج ايمانك بيفيض الزيت
وبيتك بيصفّي بنعمة الديّان
فردوس كلما ببيتك تلاقيت
وكلما انبنى عا قوة الإيمان
الملايكي بالبيت بيصيروا
ويسوع بيصفّي اساس البيت
