أنطوان القزي
بعدما أنهى الملك (أنطوان كرباج) حديثه في مسرحية “ناطورة المفاتيح” (1972) مع زاد الخير (فيروز)، قال للقائد:
يا قايد اتركوا زاد الخير بس قبل ما تتركوها شغلوها شوي بزقّ الحطب
زاد الخير : يا مولانا!
الملك : يالله بيكفي .. يا جاد الحكيم
جاد الحكيم : نعم يا مولانا
الملك : إذا سألوك شو أهم شروط الملك اختصرهون بـ تلات كلمات
جاد الحكيم : العدل ، المحبة ، وراحة البال
الملك : عظيم .. اختصرهون بكلمة وحدة
جاد الحكيم : الضمير
الملك : بتعرف يا جاد حكَمَك صارت شايبة متل دقنك ، لك إلك عشر سنين لاحقني بالضمير ما كنت تجدد ، غيّر شي مرة قول السهر الخمر ، الضمير بيتعّب يا جاد الخمرة بتريح أكتر
جاد الحكيم : قلي عليك الأمان
الملك : عليك الأمان ، بس ليك أوعى تكبر بالحكي ها
جاد الحكيم : ما بيكفي الناس الضرايب والسخرة والسكوت حتى تزيد عليون حصة الملك وتجعل حالك شريك النص بمواسمهون وممتلكاتون
الملك : أنا الملك يا جاد والملك بيملك كل شي ، ليه بتشوف اني أخدتلون النص ، ما بتشوف إني تركتلون النص
جاد الحكيم : يا مولانا الناس مش راضيين
الملك : ليه مين بيرضي الناس ، وبعدين شو بدون يعملوا اضراب بفشلو ، تمرّد بسكّتو ، احتجاج ما بسمعو . ثورة عندي حرس كفاية ..
جاد الحكيم : ما حدا بيقدر يحبس المي ، والناس متل المي إلا ما تلاقي منفذ تتفجّر منو
الحارس : اركع
مراد الأسمر : مش رح اركع
الملك : إنت مراد الأسمر ، نحنا كنا رفقة ، كنا ندرس الفلك سوا ونراقب النجوم سوا ونتنزّه بين الكواكب سوا ، كارمني واركع
مراد الأسمر : مش رح اركع
الملك : طيب ع الركبة ونص
مراد الأسمر : قلت لأ
الملك : نبقى نحكي لبعضنا أسرار ، ورفقة عمر ، يا جاد الحكيم صاحبي مراد ما بيركع حابب شوفو راكع قدامي ما بيكارمني
مراد الأسمر : ليش بدي اركع ؟
الملك : هاك النجمة الليلكية ما كنا نعرف اسمها فايق شو بتبعد عن الأرض ؟
مراد الأسمر : قد ما بعدنا أنا وإنت عن بعض
الملك : عفاك ، ملايين السنين ، شفتو شفتو مراد كان يدرس ويطالع دايماً ، أنا كنت كسلان دايماً الطشّي بالصف ، لشو بدي ادرس كنت عارف حالي بدي صير ملك لكن إنت من الأول نيتك غش ناوي تتفوق عليي ، قلي شو فادك الدرس ؟
مراد الأسمر : فتحلي عينيي
الملك : مش أحلى كانو يضلو مغمضين ونضل صحاب !
مراد الأسمر : يا ريت فيك تفوت ع البيوت وتشوف التعاسة
الملك : يا حبيبي يا مراد كيف عم يحكي ، حرام هالناس قديش صار في عم يحكو بإسمون ، وأنا شو اي أنا الوحيد اللي إلي حق إحكي بإسم الناس
مراد الأسمر : الناس مش نجوم تتراقبون من الأبراج ، بدك تنزل لعندون لتحت حتى تشوفون
الملك : إلنا عشرين سنة مختلفين ع هالناحية البسيطة ، على كل حال رح فرجيك اني أنا أحسن منك وما بنسى الخبز والملح ، رح خليك ضيفي على طول ..
يا حراس احبسوا مراد مية سنة
مراد الأسمر : اقتلني .. أفضل من هالحكم
الملك : ولو يا عمي كيف بدنا نقتلك ما إنت صاحبنا ، إذا قتلناك منصير بدنا نجيب ولادك يكفو الحكم عنك بعرف عندك تلات ولاد .. هانت الشغلة .. تلاتة وإنت أربعة رح قسّم الحكم عليكون كل واحد خمسة وعشرين سنة
مراد الأسمر : إنت تعيس يا هالملك تعيس .. عم تجرب تتسلى بظلم الناس ، لكن رح تغرق بوحشة نفسك
الملك : خدوه بلّش يخبّص .. يا جاد الحكيم ، ليه مراد حكي عن وحشة نفسي وأنا كنت رايق وعم ابتسم ؟
جاد الحكيم : لو كنت رايق فعلاً ما كنت حكمتو هالحكم
الملك : أنا ما أخدت رأيك بالحكم .. جيبولي القيثارة
Recent Comments