تابعنا على

Share on facebook
شارك على
Share on twitter
شارك على
Share on linkedin
شارك على

فرح السماء بخاطئ يتوب

بقلم نجيب داود

قال مخلصنا له المجد على الدوام ايُّ انسانٍ منكم له مئة خروف واضاع واحداً منها ألا يترك التسع وتسعين في البرية ويذهب لأجل الضال حتى يجده واذا وجده يضعُهُ على منكبيه فرحاً ويأتي الى بيته ويدعو الأصدقاء والجيران قائلاً لهم: افرحوا معي لأني وجدتُ خروفي الضال . اقول لكم انه هكذا يكون فرح في السماء بخاطئ واحد يتوب اكثر من تسعة وتسعين باراً لا يحتاجون الى اي توبة. او اي امرأة لها عشرة دراهم إن اضاعت درهماً واحداً الا توقد سراجاً وتكنّس البيت وتفتّش باجتهاد حتى تجده واذا وجدته تدعو الصديقات والجارات قائلة ” افرحن معي لأني وجدت الدرهم الذي اضعته، هكذا يكون فرح قدّام ملائكة الله بخاطئ  واحد يتوب.

الانسان شو الإنسان يا أخوان

غير بإيمانو واجباتو يدوب

ويتأمل بدينونة الديّان

ألما في لنا من حكمها مهروب

الانسان لازم يعرف الإيمان

إنو الخلاص ومغفرة الذنوب

معرَّض الإنسان شو ما كان

للخطيّي وتقلها المعيوب

المهم  إنو يرجع الانسان

من كل قلبو لخالقو ويتوب

* * *

التوبي ما فينا نشتري ولا نبيع

التوبي أماني لربّنا وموعد

درب السما ما بتقبل التكويع

ترسمل بالله للسما بتصعد

غير اسم الله من القلب لا تذيع

ويسوع ابنو الجوهر الأوحد

ولا تكتّر قبال الدني مشاريع

كلما بتعلى فيهم بتقعد

ولا يغرّك المظهر ولا التلميع

المهم عن يسوع لا تبعد

ولا تضيع بالأرقام والتجميع

تأمّل نعاج الكلّها بمذود

النعجي البترجع بعدما تضيع

بتسوى الحظيري كلها وازود

* * *

تأمّل بحالك كل وقت وحين

قيمة الشيء بواقعو الموجود

العود والعوّاد والتلحين

إن ضاعت الريشي بيضيع العود

وانت يا خاطي امورك زين

واستندم وللرب صلّي وعود

خود المتل لو عندك ملايين

ودرهم فقد بحسابك المعدود

بتصير تبرم متل المجانين

حتى تلاقي الدرهم المفقود

وهيك البحق الرب مخطيّين

لما بيتوبو والكنيسي شهود

ربّنا بيسامح التايبين

وفرحتو فيهم ما إلها حدود

* * *

يسوع يا انسان كرمالك

مات وبموتو قصد تا يفديك

وبالقيامي زاد آمالك

وانت بمماتو والقيامي شريك

خلّي يسوع مالك ورسمالك

لو جعت كلمة ربنا بتغنيك

وبالمرض وجّه ليه سؤالك

الرب وحدو بقدرتو يشفيك

وإن غرقت بنهر اوحالك

بالندامي الرب بينجِّيك

وان ضعت لازم تلتقي بحالك

تالرب يفرح فيك ويلاقيك.

* * *

لمّا الدوا بيضيع يا موجوع

الاوجاع بتزيدك لهيب وجوع

لا تضل عايش ضايع وحيران

وتمشي طريقك كل فشخه كوع

بالكون لا تضلك ذنب غرقان

خلّي الندامي تشد فيك طلوع

الخسران يلّي بيتبع الشيطان

وبتضيع نفسو بشهوة الممنوع

وربحان كل شي اللي اخذ غفران

غفران كامل من قلب يسوع

شارك على

Share on facebook
Facebook
Share on twitter
Twitter
Share on linkedin
LinkedIn